ടാറ്റ ടെലി പൊന്നോണ വിസ്മയം ഓഫറുമായി

ഓണാഘോഷത്തോടനുബന്ധിച്ച് ഇന്ത്യയിലെ പ്രമുഖ ടെലികോം കമ്പനിയായ ടാറ്റാ ടെലി സര്‍വീസസ് മൂന്ന് പ്രത്യേക ഓഫറുകള്‍ അവതരിപ്പിച്ചു. ആകര്‍ഷക വിലയില്‍ ഹാന്‍ഡ്‌സെറ്റുകള്‍, മികച്ച കോളിംഗ് നിരക്കുകള്‍, ഫുള്‍ ടോക്ക് ടൈം എന്നിവയടങ്ങുന്ന പൊന്നോണ വിസ്മയം ഓഫര്‍ ആഗസ്റ്റ് 31 വരെ നിലവിലുണ്ടാവുമെന്ന് ടാറ്റാ വാക്കി ബിസിനസ് ദേശീയ മേധാവി വിജയ് ബാലകൃഷ്ണന്‍, ടാറ്റാ ടെലി സര്‍വീസസ് റീജണല്‍ ചീഫ് ഓപ്പറേറ്റിംഗ് ഓഫീസര്‍ (കേരള -കര്‍ണാടക) സഞ്ജീവ് ഖേര, കേരള സര്‍ക്കിള്‍ ചീഫ് ഓപ്പറേറ്റിംഗ് ഓഫീസര്‍ കെ.വി. രാധാകൃഷ്ണന്‍ എന്നിവര്‍ പത്രസമ്മേളനത്തില്‍ പറഞ്ഞു.

ടാറ്റ വാക്കി പ്രീപെയ്ഡ് സ്‌പെഷല്‍ 999 ഓഫറില്‍ എല്‍ജി 450 ടി ഹാന്‍ഡ്‌സെറ്റ് 999 രൂപയ്ക്ക് ലഭിക്കും. ഇതോടൊപ്പം 197 രൂപയുടെ ആദ്യറീചാര്‍ജില്‍ വരിക്കാര്‍ക്ക് എല്ലാ ടാറ്റ നമ്പരുകളിലേക്കും മിനിട്ടിന് 25 പൈസയ്ക്ക് ലോക്കല്‍ വിളിക്കാനാകും. മറ്റു ശൃംഖലകളിലേക്കുള്ള ലോക്കല്‍ കോളുകള്‍ക്ക് മിനിട്ടിന് 35 പൈസയും എസ്ടിഡിക്ക് 45 പൈസയുമാണ്. അധിക ആനുകൂല്യമായി ഞായറാഴ്ചകളില്‍ ഏതു ശൃംഖലകളിലേക്കും ഇന്ത്യയൊട്ടാകെ രണ്ടുമണിക്കൂര്‍ നേരം സൗജന്യമായി വിളിക്കാം. ഗള്‍ഫിലേക്ക് വിളിക്കുന്നതിന് മിനിട്ടിന് 5.99 രൂപയായിരിക്കും. ഈ വൗച്ചറിന്റെ കാലാവധി 30 ദിവസമാണ്.

ഓണക്കാലത്ത് ടാറ്റ ഇന്‍ഡികോം കളര്‍ എഫ്.എം. മൊബൈല്‍ ഹാന്‍ഡ്‌സെറ്റുകള്‍ 888 രൂപയ്ക്കു നല്‍കും. ബ്ലാക്ക് ആന്‍ഡ് വൈറ്റ് ഹാന്‍ഡ്‌സെറ്റിന് 777 രൂപയാണ്. 299 രൂപയുടെ പ്രത്യേക താരിഫ് വൗച്ചര്‍ ഉപയോഗിച്ച് ചാര്‍ജ് ചെയ്യുമ്പോള്‍ ടാറ്റ ഇന്‍ഡികോം വരിക്കാര്‍ക്ക് ടാറ്റ വാക്കി, ടാറ്റ ഇന്‍ഡികോം, ടാറ്റ ഡോകോമോ, വിര്‍ജിന്‍ മൊബൈല്‍ എന്നിവ അടങ്ങിയ ടാറ്റ വേള്‍ഡിലേക്ക് പരിധിയില്ലാതെ ടോക്ക്‌ടൈം ലഭിക്കും. മറ്റു ശൃംഖലകളിലേക്ക് ദിവസവും 30 മിനിട്ട് നേരം ലോക്കല്‍ കോളുകള്‍ സൗജന്യമായിരിക്കും. ഞായറാഴ്ചകളില്‍ മറ്റു ശൃംഖലകളിലേക്ക് സൗജന്യമായി 60 മിനിട്ട് വരെ ലോക്കല്‍ കോള്‍ വിളിക്കാം.

ടാറ്റ ഇന്‍ഡികോം, ടാറ്റ വാക്കി പ്രീ-പെയ്ഡ് വരിക്കാര്‍ക്ക് പ്രത്യേക ആര്‍സിവി 51, ആര്‍സിവി 111 എന്നിവ ഉപയോഗിച്ച് ചാര്‍ജ് ചെയ്യുമ്പോള്‍ മുഴുവന്‍ സമയം ടോക്ക്‌ടൈം ലഭിക്കും. 30 ദിവസമാണ് കാലാവധി. വിവിധ വിഭാഗങ്ങളിലുള്ള പ്രീ-പെയ്ഡ് വരിക്കാര്‍ക്കായാണ് ഈ വൗച്ചര്‍ അവതരിപ്പിക്കുന്നത്.